۔ پہلی آیت میں قرآن کریم کے کلام الہی اور حق ہونے کا بیان ہے کتاب سے مراد قرآن ہے اور وَالَّذِيْٓ اُنْزِلَ اِلَيْكَ مِنْ رَّبِّكَ سے بھی ہوسکتا ہے کہ قرآن ہی مراد ہو لیکن واؤ حرف عطف بظاہر یہ چاہتا ہے کہ کتاب اور اَلَّذِيْٓ اُنْزِلَ اِلَيْكَ  دوچیزیں الگ الگ ہوں اس صورت میں کتاب سے مراد قرآن اور اَلَّذِيْٓ اُنْزِلَ اِلَيْكَ سے مراد وہ وحی ہوگی جو علاوہ قرآن کے رسول کریم ﷺ پر آئی ہے کیونکہ اس میں تو کوئی کلام نہیں ہوسکتا کہ رسول کریم ﷺ پر آنے والی وحی صرف قرآن میں منحصر نہیں خود قرآن کریم میں ہے وَمَا يَنْطِقُ عَنِ الْهَوٰى اِنْ هُوَ اِلَّا وَحْيٌ يُّوْحٰى۔ (معارف القرآن)

4۔  اسے  محض ایک اتفاقی حادثہ قرار دینے کے لیے بڑی ہٹ دھرمی درکار ہے۔ (تفہیم القرآن)

5۔گردن میں طوق پڑا ہونا قیدی ہونے کی علامت ہے۔ ان لوگوں کی گردنوں میں طوق پڑے ہونے کا مطلب یہ ہے کہ لوگ اپنی جہالت کے، اپنی ہٹ دھرمی کے، اپنی خواہشات نفس کے، اور اپنے آباواجداد کی اندھی تقلید کے اسیر بنے ہوئے ہیں۔ یہ آزادانہ غور و فکر نہیں کرسکتے۔ انہیں ان کے تعصبات نے ایسا جکڑ رکھا ہے کہ یہ آخرت کو نہیں مان سکتے اگرچہ اس کا ماننا سراسر معقول ہے، اور انکار آخرت پر جمے ہوئے ہیں اگرچہ وہ سراسر نامعقول ہے۔ (تفہیم القرآن)

6۔اِنَّ رَبَّكَ لَذُوْ مَغْفِرَةٍ لِّلنَّاسِ عَلٰى ظُلْمِهِمْ۔حضرت ابن عباسؓ صحابی سے منقول ہے کہ قرآن مجید میں سب سے بڑھ کر پُرامید و پُرتسلی یہی آیت ہے ،اور سدی تابعی نے بھی یہی کہا ہے اور کہا ہے کہ یہ مغفرت بشارت غیر تائبین کیلئے ہے۔۔۔۔۔متکلمین اہل سنت نے آیت سے یہ نکالا ہے کہ صاحب کبائر کی مغفرت توبہ کے بغیر بھی ہوسکتی ہے، ورنہ توبہ گناہ کو زائل کرہی دیتی ہے مؤمن تو ظالم جبھی تک ہے ،جب تک غیر تائب ہے۔(تفسیر ماجدی)

تفسیر آیات:

9۔ عٰلِمُ الْغَيْبِ وَالشَّهَادَةِ الْكَبِيْرُ الْمُتَعَال غیب سے مراد وہ چیز ہے جو انسانی حواس سے غائب ہو یعنی نہ آنکھوں سے اس کو دیکھا جاسکے نہ کانوں سے سنا جاسکے نہ ناک سے سونگھا جاسکے نہ زبان سے چکھا جاسکے نہ ہاتھوں سے چھو کر معلوم کیا جاسکے۔ (معارف القرآن)

12۔بادل اور بارش پر میکائیل فرشتہ مقرر ہے۔ (تیسیر القرآن)

13۔ اصطلاح ِ شریعت میں اس سے مراد وہ فرشتہ ہے جو ناظمِ ابر و سحابیات ہے۔(تفسیر ماجدی)

۔  فرشتوں کے جلال خداوندی سے لرزنے اور تسبیح کرنے کا ذکر خصوصیت کے ساتھ یہاں اس لیے کیا کہ مشرکین ہر زمانے میں فرشتوں کو دیوتا اور معبود قرار دیتے رہے ہیں اور ان کا یہ گمان رہا ہے کہ وہ اللہ تعالیٰ کے ساتھ اس کی خدائی میں شریک ہیں۔ اس غلط خیال کی تردید کے لیے فرمایا گیا کہ وہ اقتدار اعلی میں خدا کے شریک نہیں ہیں بلکہ فرمانبردار خادم ہیں اور اپنے آقا کے جلال سے کانپتے ہوئے اس کی تسبیح کر رہے ہیں۔۔۔۔ یعنی اس کے پاس بیشمار حربے ہیں اور وہ جس وقت جس کے خلاف جس حربے سے چاہے ایسے طریقے سے کام لے سکتا ہے کہ چوٹ پڑنے سے ایک لمحہ پہلے بھی اسے خبر نہیں ہوتی کہ کدھر سے کب چوٹ پڑنے والی ہے۔ ایسی قادر مطلق ہستی کے بارے میں یوں بےسوچے سمجھے جو لوگ الٹی سیدھی باتیں کرتے ہیں انہیں کون عقلمند کہہ سکتا ہے ؟ (تفہیم القرآن)

14۔  پکارنے سے مراد اپنی حاجتوں میں مدد کے لیے پکارنا ہے۔ مطلب یہ ہے کہ حاجت روائی و مشکل کشائی کے سارے اختیارات اسی کے ہاتھ میں ہیں، اس لیے صرف اسی سے دعائیں مانگنا برحق ہے۔ (تفہیم القرآن)

15۔ یَسْجُدُ۔سجدہ یہاں یہ اصطلاح شرعی نہیں بلکہ اپنے اصلی و لغوی معنی میں ہے، یعنی سب کے سب اللہ کے آگے جھکے ہوئے ،اور اس کی مشیت کے مطیع و منقاد ہیں اور  سجدہ کو سجدہ صرف دلالۃ ًکہا جائیگانہ کہ عبادۃً۔(تفسیر ماجدی)

قوموں کے عروج و زوال کا قانون :

خدا نے آج تک اس قوم کی حالت نہیں بدلی                                نہ ہو جس کو خیال آپ اپنی حالت کے بدلنے کا

- جن نعمتوں سے کوئی قوم بہرہ ور ہوتی ہے ان سے اسے بلاوجہ محروم نہیں کردیا جاتا ۔(ضیاء القرآن)

- افراد اقوام کا اٹل قانون ۔ہر وہ شخص یا قوم جو اپنی موجودہ پستی پر نالاں ہے اور عروج و بلندی کی خواہاں ، وہ یہ آیت پڑھے۔(ضیاء القرآن)

17۔ (i) بقاکی کشمکش (Struggle for existence)(ii) اور بقائے اصلح(Survival of the fittest) ۔جو چیز افادیت اور نفع رسانی کی صفت سے محروم ہوگی ،وہ فنا ہوجائے گی۔حق نفع رساں اور باطل ضرررساں ۔جب تک بنی اسرائیل رشدوہدایت کا چراغ روشن کئے رہے ۔انی فضلتکم علی العالمین کا شرف انہیں نصیب رہاجب ملت اسلامیہ نے اس ذمہ داری کو سنبھالا تو خیرالامم قرار پائی۔جب اس کا نشتر تحقیق کند اور جذبۂ جہاد ٹھنڈا پڑگیا تو الحمرا کی دیواروں کے سایوں میں ان کے بوڑھوں اور بچوں کو بے دردی سے ذبح کردیا گیا۔ شاہی محلات میں شہزادیوں کی عصمتیں لوٹی گئیں۔(ضیاء القرآن)

ــــحق و باطل کی دوسری مثال یہ ہے کہ جب دھاتوں کو،جن سے زیورات یا دوسری کارآمد اشیاء بنتی ہیں۔کٹھالی میں تپایا جاتاہے تو اس کا ناکارہ حصہ اور کھوٹ سب کچھ ایک دم  اوپرآکرکام کی چیز کو چھپاتاہی نہیں بلکہ اس پر پوری طرح چھاجاتاہے۔لیکن یہ سب کچھ بلآخر جل جاتاہے اور اسے باہر پھینک دیا جاتاہے اور مائع  دھات جس کا زیور وغیرہ بنتاہے وہ نیچے ہوتی ے اسی طرح معرکہ حق و باطل میں ایک دفعہ باطل ضرورحق پر چھاجاتاہے لیکن بلآخر حق ہی باقی رہتاہےکیونکہ وہی لوگوں کے فائدہ کی چیز ہوتی ہے۔(تیسیر القرآن)

- کارل مارکس کا (Thesis, anti –thesis, synthesis)(بیان القرآن)

تفسیر آیات:

19۔ اُنْزِلَ اِلَیْكَ۔ اس سے قرآن مراد ہونا تو ظاہرہی ہے،باقی رسول اللہؐ نے وحی خفی کی بناپر قرآن سے باہر جو احکام دئیے ہیں ،وہ بھی اس کے عموم میں شامل ہیں۔(تفسیر ماجدی)

20۔ عَهْدُ اللّٰہ سے مراد وہ عہد اطاعت ہے جو انسان روز اول اللہ سے کرچکاہے۔۔۔۔۔ایک تفسیر یہ بھی کی گئی ہے کہ یہ لفظ حقوق اللہ کے مرادف ہے اور اس کی ادائی کا درجۂ اقل یہ ہے کہ معاصی کبیرہ سے اجتناب رہے۔(تفسیر ماجدی)

21۔ ان دومثالوں سے یہ حقیقت واضح ہوتی ہے کہ یہ کائنات اپنے مزاج سے ہرنافع کو باقی رکھنا چاہتی اور غیر نافع کو برابرچھانٹتی رہتی ہے۔اسی طرح اللہ تعالیٰ حق اور باطل کو ٹکراتا ہے تو باطل خس و خاشاک کی طرح اڑجاتاہے ،لیکن حق باقی رہتاہے ۔یہ اس بات کی شہادت ہے کہ وہ حق و باطل کی اس کشمکش میں، جو قرآن کے نزول سے برپا ہوئی ہے،باطل کو مٹادے گا اور قرآن کے حاملین باقی رہ جائیں گے۔(ترجمہ: مولانا امین احسن اصلاحیؒ)

22۔ الَّذِیْنَ۔ ۔۔ رَبِّهِمْ۔یعنی دین حق پر ہرطرح کی جسمانی صعوبتوں اور دماغی پریشانیوں کے باوجود قائم رہتے ہیں، اس صبر کے عموم میں ہرقسم کے احکام تشریعی اور مصائب تکوینی پر صبر شامل ہے۔۔۔۔خوب غور کرکے دیکھ لیا جائے، ان خوش قسمت بندوں کے صفات و عادات میں کہیں ذکر ان کی "مادی ترقیوں"کا اور ان کی اعلیٰ علمی ڈگریوں اختراعات و ایجادات کا، ان کے مالی و کاروباری کارناموں کا ان کے سائنسی انکشافات کا آتاہے؟۔(تفسیر ماجدی)

25۔ بے دینی اور تقاضائے جاہلیت کو لاکھ خوشنما و نظر فریب اصطلاحات کے پردہ میں چھپایا جائے جیساکہ موجودہ تہذیب و تمدن کے پرستار اس کے ساتھ معاملہ کرہی رہے ہیں ،اس کے پھیلاؤ کا نتیجہ اختلالِ امن اور فساد فی الارض حسد و منافست ،بے حیائی ،جنس پرستی کی صورت میں نکلنا لازمی ہے۔جیساکہ مدت سے ارض فرنگ میں نظم و انتظام کی ساری خوش غلافیوں کے باوجود دیکھنے میں آرہاہے۔(تفسیر ماجدی)

تیسرے رکوع میں اللہ کے بندوں کی نو صفات :

(i) اللہ کے عہد کو پورا کرنے والے (الست بربکم قالوبلیٰ) (ii) وہ کسی عہدو میثاق کی خلاف ورزی نہیں کرتے (iii)اللہ تعالیٰ نے جن تعلقات کو قائم رکھنے کا حکم دیا ہے ان کو قائم رکھتے ہیں(iv)اپنے رب سے ڈرتے ہیں(v) برے حساب سے ڈرتے ہیں(vi) جو خالص اللہ کی رضا جوئی کےلئے صبرکرتے ہیں۔(vii)نماز قائم کرتے ہیں(محض پڑھتے نہیں)(viii) اللہ کے دئیے ہوئے رزق میں سے خفیہ اور علانیہ خرچ کرتے ہیں۔(ix)برائی کو بھلائی سے دفع کرتے ہیں۔۔۔۔بعد ازاں نافرمان بندوں کی علامات:  (i)اللہ کے عہد کو پختہ کرنے کےبعد توڑ دیتے ہیں (ii) ان تعلقات کو قطع کردیتے ہیں جنکو اللہ نے قائم رکھنے کا حکم دیا تھا (اللہ اور رسول سے تعلق ، قطع رحمی ، اسلامی اخوت کونقصان) (معارف القرآن)

28۔ اللہ کو یادکرنے ،اللہ کی تسبیح  اور حمد بیان کرنے کی فضیلت کی بابت رسول اللہؐ نے فرمایا :"اس شخص کی مثال جو اپنے رب کا ذکر(تسبیح بیان)کرتاہے،اس شخص کے مقابلے میں جو اپنے رب کا ذکر (تسبیح)نہیں کرتا،ایسے ہی ہے جیسے مردہ کے مقابلے میں زندہ کی۔"(صحیح بخاری،الدعوات۔باب"66،حدیث:6407) ۔ ذکرالٰہی کے بہت فضائل ہیں:۔ رسول اللہؐ نے فرمایا:"جو کوئی دن میں سوبار"سبحان اللہ وبحمدہٖ"کہے تو اس کی تمام (صغیرہ)خطائیں معاف کردی جاتی ہیں اگر چہ سمندر کی جھاگ کے برابر ہوں۔"(صحیح بخاری،الدعوات،باب:65حدیث:6405) ۔ ایک اور روایت میں ہے:"جوشخص دن میں سوبار"لاالٰہ الا اللہ وحدہ لاشریک لہ،لہ الملک ولہ الحمد وھو علی کل شئی قدیر"(اللہ کے سوا کوئی معبود نہیں وہ اکیلا ہی ہے،اس کا کوئ شریک نہیں، اسی کی بادشاہی ہے اور اسی کیلئے سب تعریفیں ہیں اور وہ ہرچیز پر قدرت رکھنے والا ہے۔)کہے تو اُسے دس غلام آزاد کرنے کے برابر ثواب دیا جاتاہے اور اس کیلئے (اس کے نامۂ اعمال میں)سونیکیاں لکھ دی جاتی ہیں اور اس کے نامۂ اعمال سے سو برائیاں مٹادی جاتی ہیں اور یہ عمل دن بھر شیطان کے شر سے اس کی حفاظت کرتاہےاور کوئی بھی شخص اس دن اس شخص سے بڑھ کر کوئی نیک عمل نہ لاسکے گا ماسوائے اس کے جس نے یہ عمل اس سے زیادہ بارکیا۔"(صحیح بخاری، الدعوات، باب:64۔حدیث 6403)( احسن الکلام)

ـــ جسم کی غذا ( مٹی کی غذامٹی سے پیدا ہونے والی چیزیں )، روح کی غذا (ذکر الٰہی،کلام ِ الٰہی)۔  (بیان القرآن)

ـــدولت ، حکومت، منصب ،جاگیر ، کوئی چیز انسان کو حقیقی سکون و اطمینان (ذکر ، قرآن، نماز ،قیام الیل، تہجد ، نیند نہ آنا مسئلہ نہیں ، جاگنا اور نیند توڑنا مشکل ) (تفسیر عثمانی)

ــــیعنی ذکر الٰہی میں خاصیت ہی یہ ہے کہ یہ انسان کے قلب کو غیر اللہ کی طرف متوجہ ہونے کے الجھاؤسے بچادیتاہے ،اور شرک سے جو انتشار ذہنی پیدا ہوتاہے ،یقینی تو حیداس کیلئے تریاق بن جاتاہے ۔۔۔البتہ اس اطمینان کے بھی مختلف درجے اور مرتبے ہیں، جس درجہ کا ذکر الٰہی ہوتاہے اسی نسبت سے اطمینان ِ قلب بھی حاصل ہوتاہے۔(تفسیر ماجدی)

29۔ طوبیٰ سے مراد کیا ہے؟ لفظ طوبیٰ کے معنی ایسی خوشی حاصل ہونا جس سے انسان کے دل کے علاوہ اس کے حواس بھی لطف اندوز ہوں(مفردات)اور جنت  کی نعمتیں سب ایسی ہی ہوں گی بعض مفسرین نے طوبیٰ سے مراد وہ درخت لیا ہے جس کا ذکر احادیث میں آتاہے کہ وہ جنت میں ایک درخت ہے جس کے سایہ میں ایک سوار اگر سوسال تک بھی چلتا رہے تو اس کا سایہ ختم نہ ہو۔(بخاری،کتاب التفسیر،سورۂ واقعہ زیر آیت(ظل ممدود)اہل عرب کیلئے ایسے درخت  کا جنت میں موجود ہونا ایک بہت بڑی خوشخبری ہے۔کیونکہ عرب  کا اکثر علاقہ سنگلاخ اور ریگستانی ہے۔شدت کی گرمی پڑتی ہے ۔لوئیں چلتی ہیں مگر درخت یا درختوں کے سائے بہت کم پائے جاتے ہیں۔ اسی لیے جنت کی نعمتوں کا جہاں ذکر آتاہے وہاں ٹھنڈے پانی او رگھنی اور ٹھنڈی چھاؤں کا بالخصوص ذکرہوتاہے۔(تیسیر القرآن)

30۔رحمٰن سے کافروں کا چڑنا:۔ رحمٰن اللہ تعالیٰ کا دوسرے درجہ پر ذاتی نام ہے جیسے فرمایا"قل اد عوااللہ اوادعوا الرحمن"(17: 110) اسی لیے یہ لفظ بھی اللہ کی طرح کسی مخلوق کیلئے استعمال نہیں ہوتا قریش مکہ کو اس لفظ سے خاص چڑ تھی ۔جیسے یہود کو جبرائیل اور میکائل فرشتوں سے چڑتھی۔چنانچہ صلح حدیبیہ کے موقع پر  جب آپؐ نے صلح نامہ کے آغاز میں بسم اللہ الرحمٰن الرحیم لکھوایا تو اس پر  قریش کے نمائندہ سہل بن عمر نے یہ اعتراض کردیا کہ یہ رحمٰن کون ہے ہم اسے نہیں جانتے جب یہ جھگڑا بڑھا تو  آپؐ نے فرمایا کہ یہ جملہ مٹاکر قریش کے دستور کے مطابق باسمک اللہ لکھ دیا جائے۔چنانچہ ایسا ہی کیا گیا۔(بخاری، کتاب الشروط،باب الشروط فی الجہاد والمصالحہ مع اہل الحرب)۔(تیسیر القرآن)

31۔ایک روز ابوجہل اور عبداللہ بن ابی امیہ نے حضور ﷺ کی خدمت میں چند مطالبات پیش کیے کہ اگر مکہ کے پہاڑ دورہٹ جائیں اور ہماری کھیتی باڑی کےلئے زمین فراخ ہو جائے نیز اس میں چشمے اور نہریں جاری ہوجائیں اور قصی(جد اعلیٰ) قبر سے زندہ ہوجائے اور ہم بھی دوش ِ ہواپر سوار ہوکر شام و یمن تجارت کےلئے آیاجایا کریں تو پھر ہم آپ پر ایمان لائیں گے۔ اس کے جواب میں فرمایا جا رہا ہے کہ اگر ایسا کر بھی دیا جائے تو یہ ہٹ دھرم پھر بھی ایمان نہیں لائیں گے اور یہی کہہ دیں گے بڑا زبردست جادوگر ہے۔ اس شرط کی جزا محذوف ہے۔(ضیاء القرآن)

۔اس آیت کو سمجھنے کے لیے یہ بات پیش نظر رہنی ضروری ہے کہ اس میں خطاب کفار سے نہیں بلکہ مسلمانوں سے ہے۔ مسلمان جب کفار کی طرف سے بار بار نشانی کا مطالبہ سنتے تھے تو ان کے دلوں میں بےچینی پیدا ہوتی تھی کہ کاش ان لوگوں کو کوئی نشانی دکھا دی جاتی جس سے یہ لوگ قائل ہوجاتے۔۔۔۔۔۔کیا تمہیں ان سے یہ خوش گمانی ہے کہ یہ قبول حق کے لیے بالکل تیار بیٹھے ہیں، صرف ایک نشانی کے ظہور کی کسر ہے ؟ جن لوگوں کو قرآن کی تعلیم میں، کائنات کے آثار میں، نبی ﷺ کی پاکیزہ زندگی میں، صحابہ کرام رضوان اللہ علیہم کے انقلاب حیات میں نور حق نظر نہ آیا کیا تم سمجھتے ہو کہ وہ پہاڑوں کے چلنے اور زمین کے پھٹنے اور مردوں کے قبروں سے نکل آنے میں کوئی روشنی پالیں گے ؟ (تفہیم القرآن)

ــــ رسول کریمؐ کے اشارہ  سے چاند کے دوٹکڑے ہوجانا پہاڑوں کے اپنی جگہ سے ہٹ جانے سے اور تسخیر ہوا سے کہیں زیادہ حیرت انگیز ہے، اسی طرح بے جان کنکریوں کا آپؐ کے دستِ مبارک میں بولنا اور تسبیح کرنا کسی مردہ انسان کے دوبارہ زندہ ہوکر بولنے سے کہیں زیادہ عظیم معجزہ ہے،لیلۃ المعراج میں مسجد اقصیٰ اور پھر وہاں سے آسمانوں کا سفراور بہت مختصر وقت میں واپسی  تسخیر ہوا اورتختِ سلیمانی کے اعجاز سے کتنازیادہ عظیم ہے۔(معارف القرآن)

ــــمنکروں نے یہود کی تعلیم وترغیب سے فرمائشیں اس قسم کی کی تھیں کہ پیمبری کا دعویٰ ہے تو داؤدپیمبر کی طرح پہاڑوں کی تسخیر کا تماشاکیوں نہیں دکھادیتے،یا سلیمان رسول کی طرح ہواپر سفر کیوں نہیں طے کرادیتے،یا عیسیٰ نبی کی طرح مردہ سے کیوں نہیں گفتگو کرکے دکھا دیتے ،آیت ان ہی بیہودہ فرمائشوں کے جواب میں  ہے۔(تفسیر ماجدی)

 36۔ (چنانچہ وہ اس پر ایمان لے آئے اور آپ کی تصدیق کی)الذین آتیناھم الکتاب۔یہ ذکر ان لوگوں کا ہے جو سچے اہل کتاب تھے، صحیح معنی میں اپنے اپنے دین و شریعت کے پیروتھے ،یہ رسول اللہؐ پر بھی بلاتامل ایمان لے آئے۔۔۔۔اور پھر ان کا شمار صحابیانِ رسولؐ میں ہوا۔ہمارے زمانہ میں ایک ندوی عالم نے ایک مستقل کتاب ،اہل کتاب صحابہ و تابعین پر لکھ دی ہے،اس میں 63 نام ایسے ہی حضرات کے لکھے ہیں ،جو پہلے یہودی یا نصرانی تھے،اور بعد کو مشرف بہ اسلام ہوکر صحابیوں کی صف مبارک میں داخل ہوئے، اور 7 نام اہل کتاب صحابیات کے ان کے علاوہ درج کئے ہیں۔(تفسیر ماجدی)

۔ احزاب سے یہاں مراد مخالف پارٹیاں ہیں یعنی یہود، نصاری اور مشرکین عرب۔ ان کی مخالفت کی نوعیت بھی بالعموم یہ نہیں تھی کہ قرآن کے ہر حصہ سے ان کو اختلاف ہو۔ (تدبرِ قرآن)

37۔ عَرَبِیًّا۔صاف واضح عربی پر حاشیہ پارہ 12،سورہ یوسف۔آیت 2 کے ذیل میں گذر چکاہے۔۔۔۔اللہ اللہ ! دائرہ عبدیت سے ذرہ بھر قدم باہر نکالنے کی گنجائش ،سیدا لبشر اور سرور انبیاء تک کو نہیں دی گئی ہے تو کسی دوسرے کا ذکر ہی کیا۔۔۔۔اَھوآءَھُم۔ضمیر اہل کتاب کی جانب سمجھی گئی ہے اور ان کی اھواء (خواہشوں )کے اندر ان کی تحریفات بھی آگئیں۔(تفسیر ماجدی)

۔۔۔ العلم سے مراد کیا ہے؟ اس آیت میں خطاب عام مسلمانوں کیلئے ہے۔مگر بطور تاکید مزید آپؐ کو مخاطب کیا گیا ہے اور علم سے مراد علم وحی ہے یعنی منزل من اللہ احکام آجانے کے بعد نہ کسی کے قول کو تسلیم کیا جاسکتاہے اور نہ ہی کوئی سمجھوتہ کیا جاسکتاہے اور اگر کوئی شخص یہ بات جان لینے کے بعد کہ یہ بات منزل من اللہ ہے کوئی ایسا کام کرے گا تو اس کو اللہ کی گرفت سے کوئی بچا نہ سکے گا۔۔۔۔۔واضح رہے کہ کسی حدیث کی صحت معلوم ہوجانے کے بعد اتباع کے لحاظ سے کتاب اور سنت دونوں ایک ہی درجہ پر ہیں اور قرون اولیٰ میں علم حدیث کیلئے بھی العلم کا لفظ عام استعمال ہوتارہاہے۔(تیسیر القرآن)

 38۔(خواہ وہ آیت مکتوبی تنزیلی ہو،یا آیت تکوینی یعنی معجزہ و خارق) اٰیَة۔ کے دومختلف معنی ہیں، ایک تو آیت ِ قرآنی یا حکم الٰہی ،دوسرے نشان یا معجزہ ، یہاں مراد دونوں ہوسکتے ہیں ،یعنی کوئی رسول نہ اپنی طرف سے کوئی تنزیل ِ الٰہی لاسکتاہےاور نہ کوئی معجزہ۔لیکن آگے جو مضمون آرہاہے اس سے مناسب معنی آیت مکتوبی و تنزیلی ہی کے ٹھہرتے ہیں۔۔۔مرشد تھانویؒ نے فرمایا کہ آیت سے مطالبۂ خوارق کی ممانعت نکلتی ہے ،اور جب اس کی ممانعت پیمبروں سے ہے جس کا صاحبِ خوارق ہونا ضروری ہے تو اولیاء سے تو اس کی ممانعت بدرجۂ اولیٰ ٹھہرتی ہے،جن کا صاحبِ خوارق ہونا ضروری ہے بھی نہیں۔(تفسیر ماجدی)

۔۔41 زمین کو ہر طرف سے  کم کرنے سے مراد؟یعنی اسلام چاروں طرف پھیلتا جارہاہے اور کفر کی سرزمین ہر طرف سے سمٹتی اور کم ہوتی جارہی ہے اور اس کا حلقہ تنگ سے تنگ تر ہوتاجارہاہےاسلام کو غلبہ دینا اور اسے پھیلاناایسی بات ہے جس کا اللہ فیصلہ کرچکاہے جسے کوئی طاقت روک نہیں سکتی اور جوں جوں اسلام پھیلتا ہے ان پر عرصہ حیات تنگ ہوتاجارہاہے۔(تیسیر القرآن)

43۔ اس طرح کی تقدیر معلق کہلاتی ہے جس میں اس آیت کی تصریح کے مطابق محو و اثبات ہوتا رہتا ہے لیکن آیت کے آخری جملہ وَعِنْدَهٗٓ اُمُّ الْكِتٰبِ نے بتلادیا کہ اس تقدیر معلق کے اوپر ایک تقدیر مبرم ہے جو ام اللکتاب میں لکھی ہوئی اللہ تعالیٰ کے پاس ہے وہ صرف علم الہی کے لئے مخصوص ہے اس میں وہ احکام لکھے جاتے ہیں جو شرائط اعمال یا دعاء کے بعد آخری نتیجہ کے طور پر ہوتے ہیں اسی لئے وہ محو و اثبات اور کمی بیشی سے بالکل بری ہے (ابن کثیر) (معارف القرآن)